देवगड (रत्नागिरी): देवगड तालुक्यातील मीठमुंबरी ग्रामपंचायतीच्या सभागृहात विशेष ग्रामसभेचे आयोजन करण्यात आले. या सभेत प्रस्तावित अणुऊर्जा प्रकल्पाच्या मुद्द्यावर सविस्तर चर्चा झाली. मोठ्या संख्येने उपस्थित ग्रामस्थांनी आपल्या भावना आणि भूमिका स्पष्टपणे मांडल्या. चर्चेनंतर ग्रामस्थांनी एकमताने प्रस्तावित अणुऊर्जा प्रकल्पाला विरोध दर्शविणारा ठराव मंजूर केला.
ठरावात ग्रामस्थांनी गावातील शेती, बागायती, मत्स्यव्यवसाय, पर्यावरण, पर्यटन आणि जैवविविधतेच्या संरक्षणासह भावी पिढ्यांच्या हिताचा विचार करून गावात किंवा परिसरात अणुऊर्जा प्रकल्प उभारण्यास विरोध व्यक्त केला आहे. “विकासाच्या नावाखाली स्थानिकांच्या जीवनमानावर, रोजगारावर आणि नैसर्गिक संपत्तीवर परिणाम करणारे कोणतेही निर्णय स्थानिकांच्या संमतीशिवाय घेता कामा नये,” अशी मागणीही उपस्थित नागरिकांनी केली.
या ठरावाची प्रत संबंधित शासकीय विभाग, जिल्हाधिकारी आणि राज्य शासनाकडे पाठविण्यात येणार असल्याची माहिती देण्यात आली. ग्रामस्थांच्या एकमताच्या भूमिकेचा आदर करून प्रस्तावित प्रकल्पाबाबत योग्य तो निर्णय घ्यावा, अशी मागणी यावेळी करण्यात आली.
ग्रामसभेत उपस्थित नागरिकांनी हा ठराव “परिसरातील जनतेच्या लोकशाही मार्गाने व्यक्त झालेल्या भूमिकेचे खरे प्रतीक” असल्याची भावना व्यक्त केली.
मीठमुंबरी ग्रामस्थांच्या या ठाम विरोधाने परिसरात चर्चा सुरू झाली आहे. स्थानिकांच्या पर्यावरण आणि उपजीविकेच्या प्रश्नांवर केंद्रित होणाऱ्या अशा ग्रामसभांचे महत्त्व पुन्हा एकदा अधोरेखित झाले आहे.
